ស្របពេលពិធីបុណ្យចូលឆ្នាំចិនខិតជិតចូលមកដល់ តើតម្លៃមាសនៅកម្ពុជាមានការប្រែប្រួលយ៉ាងណា?

លោកបណ្ឌិត ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរឹធី បានគូសបញ្ជាក់ថា ហាងឆេងមាសនៅលើទីផ្សារអន្តរជាតិ និងកម្ពុជាបច្ចុប្បន្នហាក់មិនមានការប្រែប្រួលគួរឱ្យកាត់សម្គាល់នោះទេ ពោលគឺចាប់ពីដើមឆ្នាំ២០២៤ រហូតមកទល់ពេលនេះ ទីផ្សារមាសនៅកម្ពុជាអាចលក់ចេញបានក្នុងតម្លៃចន្លោះពីជាង២ពាន់៤រយដុល្លារទៅ២ពាន់៥រយដុល្លារក្នុង១តម្លឹង។ បើតាមអ្នកជំនាញរូបនេះ ជាទូទៅឱ្យតែរដូវចូលឆ្នាំចិនមកដល់ ទីផ្សារមាសតែងតែមានការកើនឡើងជារៀងរាល់ឆ្នាំ ដោយសារតែទាំងជនជាតិចិន ឬអ្នកជាប់សែស្រឡាយចិនតែងនាំគ្នាទិញមាសធ្វើការកាដូ ឬអាំងប៉ាវជូនគ្នានៅក្នុងឱកាសនោះ។ ប៉ុន្តែសម្រាប់រដូវចូលឆ្នាំចិនឆ្នាំនេះ អ្នកជំនាញរូបនេះកត់សម្គាល់ឃើញថា តម្លៃមាសហាក់មិនមានការកើនឡើងបន្ថែមទៀតនោះទេ ដ្បិតថាបញ្ហាភូមិសាស្រ្តនយោបាយ គួបផ្សំតម្លៃប្រាក់ដុល្លារមានទំនោរធ្លាក់ចុះនាពេលកន្លងទៅ បានធ្វើឱ្យតម្លៃមាសនៅមួយរយៈពេលចុងក្រោយនេះមានតម្លៃខ្ពស់រួចស្រាប់ទៅហើយ ខណៈដែលបញ្ហាសេដ្ឋកិច្ចធ្លាក់ចុះក៏ធ្វើឱ្យពលរដ្ឋហាក់មិនសូវសម្រុកទៅទិញមាសក្នុងរដូវចូលចិនឆ្នាំនេះដែរ។

ជាមួយគ្នានេះ ម្ចាស់ហាងមាសពេជ្រ ទីមង្គល នៅរាជធានីភ្នំពេញ បានអះអាងដែរថា តម្លៃមាសនៅកម្ពុជា បានកើនឡើងគួរឱ្យកាត់សម្គាល់ចាប់តាំងពីចុងឆ្នាំ២០២៣មកម្ល៉េះ ហើយរហូតមកទល់ពេលនេះ គឺមិនមានការប្រែប្រួលបន្ថែមទៀតនោះទេ បើទោះបីជាជិតដល់ថ្ងៃចូលឆ្នាំចិនក៏ដោយ ជាក់ស្តែងតម្លៃមាសនៅហាងរបស់លោកបច្ចុប្បន្នលក់ចេញបានក្នុង១តម្លឹងជាង២ពាន់៤៦០ដុល្លារ។ យ៉ាងណាមិញ ចំពោះការបញ្ជាទិញពីអតិថិជននារដូវចូលឆ្នាំចិននេះវិញ លោកកត់សម្គាល់ឃើញថា ក៏មានការបញ្ជាទិញជាបន្តបន្ទាប់ផងដែរ។

យ៉ាងណាក៏ដោយចុះ លោក ឡុង សំណាង វាយតម្លៃថា ហាងឆេងមាសនៅលើទីផ្សារអន្តរជាតិ និងកម្ពុជានៅពេលខាងមុខនឹងអាចធ្លាក់ចុះមកវិញ ដោយសារតែពេលថ្មីៗនេះ សហរដ្ឋអាមេរិកបានបញ្ជាក់អំពីភាពល្អប្រសើរនៃប្រាក់ដុល្លាររបស់ខ្លួន ហើយប្រសិនបើធនាគារកណ្តាលអាម៉េរិកដំឡើងអត្រាការប្រាក់គោលរបស់ខ្លួនបន្ថែមទៀតនោះ វានឹងកាន់តែទាញទម្លាក់តម្លៃមាសឱ្យធ្លាក់ចុះខ្លាំងតែម្តង។ ហើយនៅក្នុងរយៈពេលខ្លីខាងមុខនេះ លោកជឿជាក់ថា តម្លៃមាសនឹងធ្លាក់ចុះមកវិញបន្តិចផងដែរ៕