ទ្រព្យសម្បត្តិរបស់លោក Li Xiting ជាសហស្ថាបនិក និងជាប្រធានក្រុមប្រឹក្សាភិបាលនៃក្រុមហ៊ុន Shenzhen Mindray Bio- Medical Electronics បានកើនឡើង៤,៣ ពាន់លានដុល្លារអាមេរិកនៅឆ្នាំនេះ ពោលគឺកើនដល់ទៅ ១៣,៥ពាន់លានដុល្លារអាមេរិក។ នេះបើតាមទិន្នន័យពីសារព័ត៌មាន Bloomberg ឬអាចនិយាយមួយបែបថា គិតជាមធ្យមលុយរបស់គាត់កើនឡើង៣៧,៧លានដុល្លារក្នុងរយៈពេល២៤ម៉ោង ហើយវាបានធ្វើឲ្យលោក Li ដែលជាអ្នកមានស្រុកកំណើតនៅខេត្ត Anhui នៃភាគខាងកើតប្រទេសចិន បានក្លាយជាបុរសមានទ្រព្យសម្បត្តិច្រើនជាងគេបំផុតនៅសាំងហ្គាពួរ ដែលជាប្រទេសគាត់ទទួលបានសញ្ជាតិស្របច្បាប់កាលពីឆ្នាំ២០១៨។
ភាគហ៊ុនរបស់ក្រុមហ៊ុន Mindray បានហក់កើនឡើងតាំងពីមានការរីករាលដាលនៃមេរោគឆ្លង ដែលត្រូវបានរាយការណ៍ដំបូងកើតមាននៅក្នុងខេត្តHubei ប្រទេសចិន រួចបន្តរាលដាលនៅទូទាំងពិភពលោក ខណៈដែលចំនួនអ្នកឆ្លងគិតមកទល់នឹងថ្ងៃទី ២៧ ខែមេសានេះ កើនឡើងដល់ប្រមាណ ៣លាននាក់ហើយ។
អត្ថបទទាក់ទង!
តម្លៃភាគហ៊ុនរបស់ក្រុមហ៊ុន Mindray ដែលបានបើកជួញដូរនៅថ្ងៃទី ២៣ ខែមេសា គឺមានតម្លៃខ្ពស់បំផុតជិតប្រមាណ២៧០,៥២ យ័ន នៅលើផ្សារហ៊ុន ChiNext នៅទីក្រុងស៊ិនជិនប្រទេសចិន ដែលធ្វើឲ្យតម្លៃទីផ្សារហ៊ុនសរុបរបស់ក្រុមហ៊ុននេះ មានដល់៤៦,៥ពាន់លានដុល្លារអាមេរិក។
បើតាមការឆ្លើយតបតាមសារអ៊ីម៉ែលជាមួយនឹងសារព័ត៌មាន SCMP ក្រុមហ៊ុន Mindray បានបញ្ជាក់ថា «ការកម្ម៉ង់ផលិតផលរបស់ក្រុមហ៊ុនយើង មានការកើនឡើងខ្លាំងនៅអំឡុងខែមីនា។ យើងទទួលបានការកម្ម៉ង់ទិញពីជាង១០០ប្រទេស សម្រាប់ឧបករណ៍វេជ្ជសាស្ត្ររបស់យើង ក្នុងការប្រយុទ្ធប្រឆាំងនឹងមេរោគឆ្លងរីករាលដាល»។
ក្រុមហ៊ុននេះ មានផលិតឧបករណ៍ត្រួតពិនិត្យ និងតាមដានអ្នកជំងឺ ដោយទទួលបានការបញ្ជាទិញជិត១ម៉ឺនឈុត ពីប្រទេសអ៊ីតាលី ខណៈដែលអ៊ីតាលី គឺជាប្រទេសទី២ហើយនៅអឺរ៉ុប ដែលមានករណីឆ្លងមេរោគកូវីដ-១៩ ច្រើនជាងគេ។
លោក Li បច្ចុប្បន្នមានវ័យ ៦៩ឆ្នាំហើយ គាត់ធ្លាប់សិក្សាផ្នែករូបវិទ្យានៅប្រទេសចិន ដែលមានឯកទេសក្នុងវិស័យ Cryogenics មុននឹងគាត់បានអាហារូបករណ៍ទៅរៀននៅសកលវិទ្យាល័យ University of Paris ក្នុងប្រទេសបារាំង នៅអំឡុងទសវត្សរ៍ទី៨០។
ដោយមានប្រវត្តិការងារដំបូងនៅក្នុងផ្នែកស្រាវជ្រាវ លោក Li បានបន្ដធ្វើការនៅក្នុងក្រុមហ៊ុនផលិតឧបករណ៍វេជ្ជសាស្ត្រមួយនៅក្នុងមជ្ឈមណ្ឌលបច្ចេកវិទ្យាមួយនៅភាគខាងត្បូងប្រទេសចិន មុននឹងគាត់បានបង្កើតក្រុមហ៊ុនរបស់ខ្លួន គឺ Mindray នៅក្នុងឆ្នាំ១៩៩១ ជាមួយនឹងដៃគូរបស់លោក គឺ លោក Xu Hang និងCheng Minghe៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
