តាមការរាយការណ៍ដោយទីភ្នាក់ងារព័ត៌មានរ៉យទ័រ កោះតៃវ៉ាន់ បានធ្វើទំនើបកម្មកងកម្លាំងប្រដាប់អាវុធរបស់ខ្លួនកាន់តែខ្លាំងឡើងៗ ដោយមានបំពាក់អាវុធទំនើបៗ ហើយការចំណាយលើវិស័យការពារជាតិនេះ ក៏ជាអាទិភាពមួយរបស់កោះតៃវ៉ាន់ផងដែរ ពិសេសនៅពេលដែលទីក្រុងប៉េកាំងបានដាក់សម្ពាធយោធា និង នយោបាយការទូតកាន់តែខ្លាំង មកលើកោះតៃវ៉ាន់នេះ ដោយក្រុងប៉េកាំង តែងតែអះអាងយ៉ាងដាច់អហង្ការថា កោះតៃវ៉ាន់ គឺជាដែនដីរបស់ចិន។
ការចំណាយនៅក្នុងរយៈពេល ៥ឆ្នាំនេះ ត្រូវបានគេមើលឃើញ គឺជាការចំណាយបន្ថែមទៀតពីលើផែនការចំណាយឆ្នាំ២០២២ លើវិស័យយោធារបស់កោះ តៃវ៉ាន់ ដែលមានជាង ១៥ពាន់លានដុល្លារអាមេរិក។
អាជ្ញាធរកោះតៃវ៉ាន់ បានអះអាងថា ការចំណាយលើវិស័យយោធាកាន់តែច្រើនរបស់ខ្លួននាពេលនេះ គឺធ្វើឡើងស្របពេលដែលរដ្ឋាភិបាលក្រុងប៉េកាំងក៏បានបន្ដចំណាយកាន់តែច្រើនឡើងដែរ សម្រាប់វិស័យការពារជាតិរបស់ខ្លួន ។ ហើយថ្មីៗនេះ ចិនក៏បានបញ្ជូនយន្ដហោះ និង កប៉ាល់ជាញឹកញាប់មកក្បែរៗកោះតៃវ៉ាន់។
អត្ថបទគួរអាន
អាជ្ញាធរកោះតៃវ៉ាន់ បានថ្លែងប្រាប់អ្នកសារព័ត៌មានទៀតថា អាវុធថ្មីៗអាចនឹងត្រូវបានផលិតនៅក្នុងស្រុកផ្ទាល់តែម្ដង ព្រោះតៃវ៉ាន់បង្កើនសមត្ថភាពផលិតកម្មដោយខ្លួនឯង ខណៈដែលសហរដ្ឋអាមេរិក នៅតែជាផ្នែកមួយយ៉ាងសំខាន់ ក្នុងការផ្ដល់បច្ចេកវិទ្យា។
អាវុធថ្មីៗ ដែលកោះតៃវ៉ាន់មានបំណងទិញនោះ មានដូចជា នាវាផ្ទុកអាវុធមីស៊ីល និង កប៉ាល់ចម្បាំងជាដើម។
សូមបញ្ជាក់ថា បញ្ហាកោះតៃវ៉ាន់នេះ កំពុងត្រូវបានពិភពលោកកំពុងតាមដានយ៉ាងយកចិត្តទុកដាក់ ខណៈដែលស្ថានការណ៍កំពុងតែវិវត្តទៅរកស្ថានភាពតឹងតែងកាន់តែខ្លាំងឡើងៗ។ យើងនឹងរង់ចាំមើលបន្ដទៀតថា តើនឹងមានព្រឹត្តិការណ៍សំខាន់ៗ អ្វីនឹងកើតឡើងបន្ដទៀតជុំវិញទៅនឹងបញ្ហាដ៏រសើប នៃដែនដីកោះតៃវ៉ាន់នេះ៕
None
