តាមរយៈសេចក្តីជូនដំណឹងរបស់ក្រសួងប្រៃសណីយ៍នៅព្រឹកថ្ងៃព្រហស្បតិ៍ទី ២១ ខែមករាបានឲ្យដឹងថា បច្ចុប្បន្នក្រសួងបានកត់សម្គាល់ថា មានការវាយប្រហារបោកបញ្ឆោតតាមប្រព័ន្ធអ៊ីនធើណែត ឬហៅថា Phishing លើគ្រឹះស្ថានធនាគារ និងហិរញ្ញវត្ថុមួយចំនួននៅកម្ពុជាដែលក្នុងនោះ មានដូចជា ធនាគារ អេស៊ីលីដា ភីអិលស៊ីផងដែរ
សេចក្តីជូនដំណឹងដដែលបានឲ្យដឹងថា ចោរបច្ចេកវិទ្យា ឬដែលគេនិយមហៅថា Hackers បានធ្វើការវាយប្រហារដោយផ្ញើសារខ្លីៗឬសារអ៊ីម៉ែលទៅអ្នកប្រើប្រាស់ដោយមានខ្លឹមសារថា «គណនីធនាគាររបស់អ្នកត្រូវបានគេលួចបើកចូលប្រើប្រាស់ សូមបញ្ជាក់លេខសំងាត់ដើម្បីការពារគណនីរបស់អ្នក»។ ហើយក្រុមចោរបច្ចេកវិទ្យាទាំងនោះ ក៏បានភ្ជាប់មកជាមួយនឹងដំណភ្ជាប់ដែលស្រដៀងនឹងឈ្មោះធនាគាររបស់អ្នកប្រើប្រាស់។
អត្ថបទទាក់ទង!
នៅពេលអ្នកប្រើប្រាស់ចុចលើឈ្មោះដំណភ្ជាប់នោះ នឹងចូលទៅគេហទំព័រក្លែងក្លាយមួយ ដែលមានរូបរាង និងទម្រង់ស្ទើរតែ ដូចគ្នាទៅនឹងគេហទំព័ររបស់គ្រឹះស្ថានធនាគារ និងហិរញ្ញវត្ថុ ដោយតម្រូវឱ្យអ្នកប្រើប្រាស់បញ្ចូលព័ត៌មានសំខាន់ៗ ដូចជាឈ្មោះ លេខគណនី ពាក្យសំងាត់ និងលេខកូដសំងាត់ជាដើម។ ប្រការនេះ អនុញ្ញាតឲ្យ ចោរបច្ចេកវិទ្យាអាចមានលទ្ធភាពលួចចូលក្នុងគណនីធនាគាររបស់អ្នកប្រើប្រាស់ ហើយអាចបង្វែរសាច់ប្រាក់ចេញទៅ គណនីផ្សេងទៀតដែលបានគ្រោងទុកជាមុន។
ជុំវិញទៅនឹងការបោកបញ្ឆោតនេះ ធនាគារអេស៊ីលីដាក៏បាន ក្រើនរំឭក និងបញ្ជាក់ជូនអតិថិជនរបស់ខ្លួនផងដែរថា សូមឲ្យមានការប្រុងប្រយ័ត្នខ្ពស់ចំពោះ គេហទំព័រឆបោក ដែលជនខិលខូចប្រើប្រាស់ដើម្បីបន្លំយកព័ត៌មានសំខាន់ៗផ្ទាល់ខ្លួន ដូចជា៖ លេខប័ណ្ណឥណពន្ធ-ឥណទាន លេខទូរស័ព្ទ ថ្ងៃខែឆ្នាំកំណើត ឈ្មោះ លេខខម្ងាត់ ។ល។
ធនាគារអេស៊ីលីដា បន្ថែមថា «សូមពិនិត្យមើលវេបសាយឱ្យបានច្បាស់លាស់ ចៀសវាងធ្វើប្រតិបត្តិការលើវេបសាយ ដែលមានប្រភពមិនច្បាស់លាស់ និងសូមកុំឆ្លើយតបរាល់អ៊ីម៉ែល ទូរស័ព្ទ ឬសារអេឡិចត្រូនិកផ្សេងៗ ដែលព្យាយាមសួរអំពីព័ត៌មានសំខាន់ៗផ្ទាល់ខ្លួនរបស់លោកអ្នក ជាដាច់ខាត»។
សូមទាក់ទងមកធនាគារ អេស៊ីលីដា តាមរយៈ [email protected] ឬទូរស័ព្ទលេខ ០២៣ ៩៩៤ ៤៤៤, ០១៥ ៩៩៩ ២៣៣ ប្រសិនបើលោកអ្នកទទួលបានសំណើសុំព័ត៌មានសំខាន់ៗផ្ទាល់ខ្លួនខាងលើ ពីអ្នកណាម្នាក់ ឬពីអ៊ីម៉ែលដែលមិនមានប្រភពច្បាស់លាស់។
សូមបញ្ជាក់ថា ធនាគារអេស៊ីលីដា មិនដែលស្នើសុំឲ្យអតិថិជនផ្ដល់លេខគណនី, លេខសម្ងាត់, ឬ OTPឡើយ៕
None
